Synopsis: World opinion about the U.S. spikes. Opportunity is ripe to make good on U.S.’s promise to restore the Kingdom government.

I ke ka‘a ‘ana o ke eo iā Barack Obama ma ke koho pāloka ‘ana i pelekikena i ka MH 2008, ua hanu ka hapa nui o ko ka honua nei i ka hanu ho‘omaha i ka ‘upu ‘ana ua hiki mai kekahi wā o ka no‘ono‘o pono ‘ana a me ka hana pono ‘ana me nā hoa aupuni o ka honua nei. ‘A‘ole i maopopo ‘ia inā e kō ana kēia ‘upu, akā, me he mea lā, ua ku‘u like ka nae o ko ka honua nei.

Ma ka makakina ‘o Time i ka lā 5 nei o kēia mahina, ua puka kekahi hō‘ike na ka Pew Research Center e hō‘ike ana ua pi‘i ka ‘olu‘olu o ka mana‘o o ka po‘e o 22 mau ‘āina i nīnau ‘ia e pili ana i ka po‘e ‘Amelika, a he pi‘i kēia 20 ‘ai mai ‘elua makahiki aku nei mai. Kokoke piha ‘elua hapakolu o ka po‘e i nīnau ‘ia e mana‘o nei e hana ‘o Obama i ka hana pono i kona wā e noho pelekikena nei. ‘O kekahi mea ‘ano pū‘iwa, aia ma nā ‘āina nui ‘elua i mana‘o ‘ia he mau ‘āina ho‘okūkū ikaika me ‘Amelika i kēia wā, ‘o ia ‘o Kina a me Lūkia, ua ‘olu‘olu ka mana‘o he 58% o nā po‘e i nīnau ‘ia iā ‘Amelika, a he pi‘i loa kēia mai ka wā mai i ho‘omaka ai ‘o Obama i kāna hana pelekikena.

No laila, he wā kēia no ‘Amelika e ho‘okō ai i nā hana kūpono he nui ma ka honua nei me ka ‘olu‘olu mai nō o nā mana‘o o ka po‘e o nā ‘āina like ‘ole iā Obama a me ko ‘Amelika po‘e. Eia nō na‘e, he wā nō ho‘i kēia e ho‘omaopopo ai iā Obama i kekahi o nā hana e hana ai ā kūpono.

Ma ka lā 5 nei, ua hō‘ike aku nei ke Kuhina Moku‘āina, ‘o Hillary Clinton, i kona mana‘o kāhāhā a nāukiuki i ka ho‘omau ‘ia o ka ho‘onoho ‘ia ‘ana o nā pū‘ali koa Lūkia ma Geogia mai kona ho‘ouka kaua ‘ana mai i ia ‘āina ‘elua makahiki aku nei. Hō‘ike ikaika nō ho‘i ‘o Clinton ‘a‘ole i ‘ae ‘ia ka ‘ōlelo pale a Lūkia no ko lākou ho‘omau ‘ana ma laila.

E aho nō ‘o Obama e nānā pono i kona pā hale pono‘ī a me ka lele ‘ē ‘ana o ka po‘e ‘ōhua o kona hale a komo hewa a ho‘onoho i ka hale o kona po‘e hoa noho e like nō me kāna e ‘ike nei ma ha‘i o ke alanui. Koe, he 117 makahiki kēia o ka hō‘olu‘olu hewa ‘ana o ko Obama po‘e ‘ōhua ma loko o ka hale o kona hoa noho, ‘o ia ho‘i ka hale o ka ‘, ka Mahi, a me ka Palena.

‘Ōlelo ‘ia ma Time ‘o ke ki‘ina hana a ka ‘aha luna ho‘omalu o Obama o kēia manawa, ‘o ia ka ‘imi ‘ana i ka pono like o ‘Amelika a me nā hoa aupuni, a ke ‘ike ‘ia nei he holomua nui ma ia hana. Ma ka ho‘okō ‘ana o ‘Amelika i nā kānāwai pili i nā ‘āina like ‘ole, ‘a‘ohe a nā hoa aupuni, e like me Lūkia, ‘ōlelo pale e ‘a‘e ai i ia mau kānāwai.

Ma ia mana‘o ho‘okahi nō, ma ka ho‘okō ‘ana o Obama i ka ‘aelike ma waena o Cleveland lāua ‘o Lili‘u i pūlima ‘ia ma ka lā 18 o Kēkēmapa, 1893, a laila, ‘ike ‘ia ka hana pono ‘ana a nā aupuni like ‘ole. E like nō me ka hō‘ike ‘ana o ‘Amelika i ka nui o nā kao nukelea i loa‘a ma kona waihona lako kaua, pēlā nō i hana ai ‘o Pelekānia, Palani, a me Lūkia. Hilina‘i ‘ia e hana ‘o Obama i ka hana kūpono.

E ho‘ouna ‘ia mai nā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai‘i at Mānoa, supported by the Initiative for Achieving Native Hawaiian Academic Excellence.