Synopsis: The U.S.’s use of Hawai‘i-based personnel jeopardizes its position.

I ka lā 16 o Malaki o ka 1854, kuahaua a’ela ka Mō’ī Kamehameha III he ‘āina kā’oko’a ke Aupuni Mō’ī Hawai’i, ‘o ia ho’i, ‘a’ohe ona komo ma ke kaua ma waena o ‘elua mau aupuni. Ma ia hana, ua like ke aupuni nei me Kuikilani, he ‘āina kā’oko’a pū a ‘a’ole ia i komo i ke Kaua Honua II.

Ma nā kānāwai ma waena o nā ‘āina like ‘ole, inā ho’ouka kaua ‘ia kekahi aupuni kā’oko’a, hiki ke ‘āhewa ‘ia ke aupuni nāna i ho’ouka no ka ‘a’e ‘ana i ke kūlana kā’oko’a o ke aupuni i ho’ouka kaua ‘ia a hiki ke ho’ouku ‘ia i ke koi pohō a koi ‘ia e kōkua i ke kūkulu hou ‘ana i ke aupuni kumu o ia ‘āina. ‘O ia kekahi pilikia o ‘Amelika ma kona ho’ouka kaua ‘ana mai i ke Aupuni Mō’ī nei i ka 1893. No laila, ‘a’ohe ‘i’o o ka ‘ōlelo a ‘Amelika he ‘āpana ‘o Hawai’i o ua ‘āina lā.

‘O kekahi hewa hou a’e o ‘Amelika, ‘o ia ka ho’onoho ‘ana i kona pū’ali koa ma loko o nā palena o ka ‘āina o ke Aupuni Mō’ī. Akā, ua pi’i kona mea e ‘āhewa ‘ia ai ma kona ho’ohana ‘ana i kona pū’ali koa i ho’onoho ‘ia ma Hawai’i nei no ke kaua ‘ana me kekahi aupuni ‘ē, e like me ka hana ma ke Kaua Honua II no ke kaua ‘ana me Iāpana, a pēia pū no ke kaua ma Kōlea a me Vietnam mai ka 1950 mai, nā kaua ma Afghanistan a me Iraq ma ka 1990, 2001, a me ka 2003–a i kēia mau lā hope nei, pēia nō ho’i ka hana no ka pale aku iā Kōlea ‘Ākau.

Ma ka 1898, he panalā’au ‘o Guam a me ka Pae’āina Pilipino ma ka Pākīpika ma lalo o Sepānia. Ho’ouka kaua ‘o ‘Amelika i nā pūkaua Sepānia ma ua mau ‘āina lā ma ia makahiki nō, me Cuba pū nō ho’i ma ka ‘Atelanika. Ho’ouna ‘Amelika i kona pū’ali koa i ho’onoho ‘ia ma Hawai’i nei no ke kaua aku iā Sepānia ma Guam a me ka ‘āina Pilipino. Ma ia hope mai, ho’opi’i kū’ē ikaika mai nei ‘o Sepānia i mua o ke aupuni ma Wākinekona no ia hana.

Ma kāna ho’opi’i ‘ana, ‘ōlelo ke aupuni Sepānia he kū’ē ia i ka ‘a’e ‘ia ‘ana o ke kūlana kā’oko’a o ke Aupuni Mō’ī Hawai’i e ‘Amelika ma ka ho’onoho ‘ia o kona pū’ali koa ma ua ‘āina nei no ke kaua pū me Sepānia. Ma kēia hana, ho’okō ‘ia nā ku’ikahi ma waena o ke Aupuni Mō’ī a me nā aupuni like ‘ole a ma hope kēia o ka ho’ouka kaua ‘ana mai o ‘Amelika i ke aupuni nei.

Hiki nō ho’i i nā aupuni o Afghanistan, Iraq, a me Kōlea ‘Ākau–‘o ia ho’i, nā ‘āina a pau i ho’ouka ‘ia e nā pū’ali koa ‘Amelika i ho’onoho ‘ia ma Hawai’i nei, ke ho’opi’i i ke aupuni ‘Amelika no ka ‘a’e ‘ana i ke kūlana kā’oko’a o ke Aupuni Mō’ī nei e like nō me ka mea a Sepānia i hana ai a koi ‘ia e uku i ke koi pohō.

He aupuni ke Aupuni Lepupalika o ka 1894 i ho‘ohele ‘ia e ‘Amelika, no laila, no ‘Amelika ‘i’o nō nā hewa kū i ke kānāwai o nā ‘āina like ‘ole i hana ‘ia ma Hawai‘i nei.

E aho loa nō e ho’opololei ‘o ‘Amelika iā ia iho ‘ānō ma ka ho’ōki ‘ana i kona ho’onoho koa ‘ana ma Hawai’i nei a pēlā e ho’omaka ai ka emi ‘ana o kona pilikia ma nā wahi ‘ē a’e o ka honua nei kekahi.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.