Synopsis: The "I Ulu I Ke Kumu" award honors individuals who have made a commitment to excellence in native Hawaiian education.

———

Aloha mai kākou e nā makamaka heluhelu mai Hawai’i moku o Keawe, a Ni’ihau a Kahelelani.

He nū ‘oli ke hō’ike ‘ia a’e nei, ‘o ia ho’i, e kau ana kekahi mau kānaka i ka hano hāweo, ‘o ia ho’i, e lilo ana ka Makana "I Ulu I Ke Kumu" iā lākou i kēia ahiahi. ‘O "I Ulu I Ke Kumu," he makana ia no ke ‘ano kanaka i lilo i kumu maika’i e ulu pono ai nā lālā o Hawai’i nei. ‘O ka inoa o nei makana, no kahi ‘ōlelo no’eau ia, ‘o ia ho’i, "I ulu nō ka lālā i ke kumu." A ‘o ka mana’o o ia ‘ōlelo, ‘o ia ho’i, e ‘ole ko kākou po’e kūpuna, ola ai a holo mua ai kākou. He nui nō ka mahalo i ua mau kūpuna nei, a ‘o kēia makana, he hō’ike ia i ka mahalo i nā kūpuna a me nā kānaka e ho’oulu nei i nā lālā a me nā pua o kēia ao nei ma o ke alaka’i ‘ana, ke a’o ‘ana a pēlā aku.

‘O kēlā makahiki aku nei ka makamua o ka ho’ohanohano ‘ia ‘ana o ka po’e "kumu" nāna i noke i ka hana e holo mua ai ka Hawai’i. A eia mai ia mau Hawai’i Alaka’i, ‘o Uncle William Aila makua, ‘o Manu Kaiama, ‘o Lilikalā Kame’eleihiwa, ‘o Oz Stender, ‘o ‘Anakē Lolena Nicholas, ‘o Haunani-Kay Trask, a me ka Hui Ho’okahe Wai Ho’oulu ‘Āina.

Ma lalo nei nā moho o kēia makahiki nei.

— ‘O Alan T. Murakami. He loio ‘o ia, nāna i alaka’i i ka Native Hawaiian Legal Corporation no ka pono o ka Hawai’i ma ke kuleana ma ka ‘āina a me ka wai, ka pono o nā iwi kupuna, ka ‘āina i kā’ili ‘ia mai ke aupuni Mō’ī, ke kānāwai ‘Āina Ho’opulapula Hawai’i a me nā mea ‘ē a’e e pono ai ka Hawai’i.

—’O Kū H. Kahakalau. Na ia nei i ho’oulu i ke Kula Ho’āmana o ke Kenekulia Hou ‘o Kanu o ka ‘Āina. Nāna nō ho’i i ho’okumu me kekahi i ka Hālau Wānana. ‘O ka mua nō ia o ka polokalamu a’o kumu o ka moku’āina ‘o Hawai’i, i pili ‘ole i kahi kulanui.

—’O Naomi Noelaniko’olau Clarke Losch. He limahana ‘o ia nei no ke ke’ena huli kanaka o ka Hale Hō’ike’ike o Kamehameha. A laila, lele akula i ke Kulanui Kaiāulu o ‘Ewa, a ma laila i a’o aku ai i ka ‘ōlelo Hawai’i no nā makahiki he 24. A i ka makahiki 1994, ho’omaka ihola ke a’o ma ke Kulanui o Hawai’i ma Mānoa a i kona ho’omaha loa ‘ana aku mai ka ‘oihana aku, ma ke ‘ano he polopeka i ka makahiki 2010. He 40 makahiki o ka ho’ōla ‘ana i ka ‘ōlelo Hawai’i.

—’O S. Haunani Apoliona. ‘O ka luna ho’omalu ‘o ia nei o ka Papa Kahu Waiwai o ke Ke’ena Kuleana Hawai’i. A e ku’upau ana ‘o ia i ka hana e pono ai nā Kānaka Maoli no nā makahiki he 30 a ‘oi ma ke Ke’ena Kuleana Hawai’i, ma ka Hui ‘o ALU LIKE, a me nā hana kaiāulu like ‘ole a me kāna hīmeni ‘ana.

I ulu ‘i’o nō ka lālā i ia mau kumu.

Inā he nīnau kāu, a he mana’o paha e ho’ohanohano aku i kekahi kumu i ulu ai nā lālā he nui a ikaika e kāhea aku iā Hawai’inuiākea, ke Kula ‘Ike Hawai’i ma ka helu, 956-0980.

———

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu

» rsolis@hawaii.edu

a i ‘ole ia, ma ke kelepona:

» 956-2627 (Laiana)

» 956-2624 (Kekeha)

This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.