Synopsis: Discusses the Ka Makaainana articles on May 7 and 28 and rewriting history.

Aloha mai e nā makamaka heluhelu mai ka puka ‘ana o ka lā i Makanoni, a i kona welo ‘ana i ka mole ‘olu o Lehua. Mahalo no ka ho’onanea ‘ana aku nei i ka mo’olelo ‘ana mai o kekahi mea kākau o ke au i hala. He mo’olelo maika’i loa ia, kahi e ‘ike ‘ia ai ke ‘ano o ka no’ono’o ‘ana o kekahi kupuna (a mau kūpuna paha) no nā hana a lākou i ‘ike ai. ‘A’ole i pa’a ka inoa o ka mea kākau ia’u, akā ‘o ke po’omana’o o ka mo’olelo āna i kākau ai, ‘o ia nō ke po’omana’o e kau a’ela ma luna, a i ho’omaka ua mo’olelo nei i ka lā 24 o Iune o ka makahiki 1895. A penei ka paukū o ka mo’olelo o ia lā.

“Ke manao nei ka mea kakau i keia wahi moolelo e hoopuka aku i kekahi mea oiaio, me ka uhiuhi ole e like me ka mea i oleloia ae ma ke akea e na mikanele, a lakou i ahai aku nei i na hana pekapeka i ke Aupuni o Amerika Huipuia a me kekahi mau aupuni e ae, e helu papa ana i na ino a me ka pelapela o ka lahui Hawaii, mai na kane a na wahine a me ka mea e noho ana ma ka nohoalii. Ua owiliia keia mau mea a pau e ua poe mikanele nei, a o ia ka na komisina o ke Aupuni Kuikawa i ahai aku ai no Wasinetona a ulaaia aku la ilaila.”

A no laila, ke ‘ike a’ela kākou e nā makamaka heluhelu i ke kumu i ulu ai ka mana’o i loko o ka mea kākau, e hō’ike aku i nā mea i hūnā ‘ia iho a i ha’i hewa ‘ia a’e paha e pili ana i ka Lāhui Hawai’i me ka hu’e pū ‘ana aku i ka ‘oia’i’o. E like ho’i paha me nā hana hō’ino i ka Mō’īwahine Lili’uokalani “e olelo ana, he Moiwahine puni koko Oia; he ake e okiia ke poo, o ka poe nana i hookahuli i ke Aupuni Moi, a pela aku” (Na hana hoino i ka Moiwahine, Nupepa Ka Oiaio, Pep 9, 1894). A ma ia mo’olelo nūpepa nō, Na hana hoino i ka Moiwahine, i hu’e ‘ia ai ka ‘oia’i’o, ‘o ia ho’i, he mana’o wale nō ko ka Mō’īwahine, e ho’okō ‘ia ke kānāwai. A ‘o ke kānāwai nō ia a ia po’e kipi i hana ai. ‘O ka mea ‘āpiki, ke heluhelu ‘ia ua mo’olelo nei e ka po’e na’aupō, e kuhi wale ana paha lākou, he mo’olelo wale nō ia e hō’ike ana i kekahi ‘ao’ao, he ‘ano ho’okae ho’i i nā ‘ao’ao ‘ē a’e, a he mau ‘ōlelo makawela wale nō.

Akā, inā i laulā ke ‘ano o ka no’ono’o o ua po’e na’aupō lā, inā ua ‘ike le’a lākou i nā mea he nui hewahewa e ho’okae ana i ke Kanaka Maoli. ‘O ka nui o nā puke mo’olelo, nā ha’awina kula, a pēlā aku, he mea ho’okae nō i ke Kanaka Maoli. Ua pōmaika’i na’e i kekahi mau puke hou i pa’i ‘ia mai nei e nā Kānaka Maoli, a me ke a’o ‘ana mai o kekahi mau kūpuna a me nā mākua paha i nā ‘ike ku’una, a me ka launa pū ‘ana me nā nūpepa ‘ōlelo Hawai’i, kahi i ‘ike ‘ia ai nā ‘oia’i’o i hūnā ‘ia e kekahi po’e kākau puke.

‘Auhea ‘oukou e nā makamaka heluhelu, ‘o ka po’e ho’i i like ka mana’o me ko’u, a me ka po’e e kū’ē nei i ko’u mana’o kekahi, he lumi ka’awale nō ko ke kino lahilahi o Kauakūkalahale, a no laila, e ho’ouna mai nō i nā mo’olelo.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa, supported by the Initiative for Achieving Native Hawaiian Academic Excellence.