comscore Hae nani o Hawai'i mau kona welo 'ana | Honolulu Star-Advertiser
Editorial | Kauakukalahale

Hae nani o Hawai’i mau kona welo ‘ana

Honolulu Star-Advertiser logo
Unlimited access to premium stories for as low as $12.95 /mo.
Get It Now

Synopsis: Makawalu Lā Kū’oko’a celebration on Monday, Nov. 28, 2011.

***

Aloha mai e nā hoa aloha ‘āina e hāpai i ka hae hanohano o Hawai’i a puni kēia pae ‘āina. Mahalo nui ‘ia ka lokomaika’i o Kauakūkalahale me ka heluhelu ‘ana mai o ‘oukou.

Kani ke olohao, kū nā pū laipela no ka Lā Kū’oko’a o Ke Aupuni Hawai’i. ‘Oiai ua kaulana ka mahina nei i ia wahi lā ‘ē a’e a ‘Amerika e ho’olaule’a ai, hāweo le’a aku nō na’e ua lā nui kūikawā, ‘o ka lā 28 o Nowemapa i kapa ‘ia ‘o ka "Hawaiian Independence Day."

He lā nui ia, na Ke Aupuni o Hawai’i i kūkulu i ka makahiki 1843 i kia ho’omana’o kūkā’oko’a poina ‘ole, he lā le’ale’a nō ho’i e ho’olaule’a ai a e hali’a aloha ai ko Hawai’i a pau i ka hana ho’onakoa a kekahi kā’e’a’e’a wiwo ‘ole nona ka inoa ‘o Timoteo Ha’alilio.

I ia manawa ma ka mo’olelo o Hawai’i, puni nā wahi moku pae ‘āina nei i nā manō weliweli kū o ka moana, ‘o ia ho’i, nā aupuni ‘a’ao o ka honua. No laila, ua koho Ka Mō’ī Lani Kauikeaouli iā Timoteo Ha’alilio mā e nonoi aku i nā po’o alaka’i o ‘Amerika, Beretania Nui, a me Farani, i ‘ikea mai ai ko Hawai’i kū’oko’a. ‘O nā palapala ‘aelike kaukolu e hō’oia ‘ia ai ke ea o Hawai’i ka hopena o kā lākou luhi mākolu. Ua hāpai ‘ia, ‘āpono ‘ia, a kāko’o ‘ia ua pāpā’ale lā a hiki i 1893, ka wā i kipi aku ai nā kū’ē aupuni i Ka Mō’ī Lili’uokalani.

‘Oiai pāpā ‘ia e ka Repubalika o Hawai’i, ‘a’ole e mālama ‘ia ka Lā Kū’oko’a, ho’olaule’a mau nō na’e nā kūpuna ma ka lā 28 o Nowemapa me ka wiwo ‘ole i ke kānāwai. Eia na’e, ua hele a nalo iho ka mana’o nui o kēia lā ma muli o ka na’aupō o kēlā me kēia hanauna ma ia hope mai.

Pehea lā ka mana’o o kākou e nā mamo o ka wā mālamalama nei? Mai noho kākou a hoka i ka ‘oli’oli ‘ole, hele mai nō i Kamakakūokalani Center for Hawaiian Studies ma UH Mānoa, ma laila ana e mālama ‘ia ai kēia lā kupaianaha e ka hui Makawalu. Iā ‘oukou e ho’olono ana i ke ku’i lono hoihoi o ke kūkākūkā politika, e inu i ka ‘awa, e ‘ai i ke pa’i’ai, e kū’ai i pālule Makawalu keu a ka mio me kekahi lā’au Hawai’i. Hana i ke kūpe’e kukui me kekahi ‘eke nani i makana. He lawa pono nā mea a ‘oukou e hana ai ma laila!

No laila, loa’a ka hae, huki i luna, inā kākou!

Manawa: Pō’akahi, Lā 28 o Nowemapa 2011; 10:00am.

Kahi: Kamakakūokalani Center for Hawaiian Studies.

Kumu: Kū’oko’a Kākou! Huki i ka Hae!

Nīnau: zuri@hawaii.edu

*He ‘ahahui kaiāulu ‘o Makawalu na nā haumāna o UH Mānoa e alaka’i ai. Inā ulu a’ela ka hoihoi i loko, nānā ‘ia hawaii-imiloa.com*


E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

 

This column is coordinated by Kawaihuelani Center for Hawaiian Language at the University of Hawai’i at Mānoa.

Comments have been disabled for this story...

Click here to see our full coverage of the coronavirus outbreak. Submit your coronavirus news tip.

Be the first to know
Get web push notifications from Star-Advertiser when the next breaking story happens — it's FREE! You just need a supported web browser.
Subscribe for this feature

Scroll Up