comscore Aia paha ka puapua i ka Hawai'i | Honolulu Star-Advertiser
Editorial | Kauakukalahale

Aia paha ka puapua i ka Hawai’i

[ AD HAS BEEN REMOVED FROM THIS STORY ]

Synopsis: Hurray for Norm Chow. But do Hawaiians always get the short end of the stick? Or prejudged not to be able to do the job?

***

Aloha Kalikimaka e nā hoa makamaka e ho’onanea nei me nā ‘ohana a me nā hoa i kēia wā kalikimaka nei. A ‘oiai, ‘o ka wā kalikimaka nō kēia, ua mana’o ‘ia e pa’i ‘ia kekahi mo’olelo kalikimaka. E ho’opane’e ‘ia na’e ma muli o ka hauwala’au no kahi makana hou, ‘o ia ho’i ka hai ‘ia ‘ana o ke po’o ka’i hou o nā Koa Ānuenue. ‘Akahi nō a kūkala ‘ia, ‘o Norm Chow ke po’o ka’i hou o ka hui pōpō peku o Hawai’i.

He mea maika’i nō kēia. Ua ho’i mai ka manu ‘ōiwi i kona ‘āina hānau. No Honolulu ‘o Chow, a mai ke Kula Ki’eki’e ‘o Punahou ‘o ia i puka mai ai. Ha’alele mai ‘o ia iā Hawai’i nei no ka ‘āina ‘ē, a ma laila ‘o ia i hana ai no nā makahiki he 38 a i ka ulu ‘ana iho o ka mana’o i loko ona e ho’i mai. A ma muli paha o ka pōmaika’i a ke Akua i kō ai ia mana’o o Chow.

Ua noi ‘o Chow i ia kūlana like ma ke Kulanui o Hawai’i i ka makahiki 1995. ‘O ia wā, he wā puni kōlea nō ia, no laila, lilo akula ia kūlana iā Fred von Appen. A ua ahu ka ‘ala’ala, e like me kā kākou i ‘ike aku ai. No ke aha lā i koho ‘ole ‘ia ai ‘o Chow i ia makahiki? He ho’okae ‘ili paha. E mana’o ana paha ka luna ‘ālapa o Hawai’i i ia manawa, ‘a’ole hiki i ka Hawai’i ke hana maika’i ma ia kūlana? Aia paha ke luliluli nei ko ‘oukou mau po’o me ka hō’ole pū ‘ana mai, “’A’ole paha e ho’okae ‘ia ka Hawai’i ma Hawai’i nei. ‘O Hawai’i kēia.” Pololei nō paha. ‘A’ohe ho’okae ‘ia o ka Hawai’i ma Hawai’i nei. Auē, ua launa nō paha ko ‘oukou mea kākau me ke Ali’i nui o O’ahu, me Kakuhihewa. ‘O ke kumu paha o Chow i koho ‘ole ‘ia ai i po’o ka’i pōpō peku no Hawai’i i ka makahiki 1995, ‘o ia ka lawa ‘ole o kāna hana ‘ana ma ke ‘ano he ka’i.

Akā, i ka hiki ‘ana mai o kākou i ka hopena o ka makahiki 2011, ua ahu a’ela ka hana maika’i a Chow ma ke ‘ano he ka’i. A no laila, holo ihola ka mana’o o ka luna ‘ālapa, ‘o Chow ka ‘oi. ‘O ka mea ‘āpiki, he hapa ‘u’uku wale nō kona uku hana i ko Greg McMackin. ‘A’ole ke kālā he mea nui iā Chow. Akā, aloha nō, i ka Hawai’i ka puapua. He ho’okae ‘ili paha ia i ka Hawai’i? ‘A’ole paha. ‘A’ole e ho’okae ‘ia ka Hawai’i ma Hawai’i nei. A i ‘ole ia, ma mua, he wā puni kōlea wale nō paha ia, a i kēia manawa, ua pau kona hie.

Hau’oli ko ‘oukou mea kākau i ka lilo ‘ana o ua kūlana po’o ka’i nei iā Chow. A hau’oli nō ho’i i ka ‘ōlelo a Chow, he mea nui ka ho’ohei ana i nā mea pā’ani pōpō peku o nā kula ki’eki’e o Hawai’i nei.

‘O ia hilina’i ‘ana o ke Kulanui o Hawai’i i ke kanaka Hawai’i, he mea nui nō ia, a ke lana nei ka mana’o, e hana like ke kula ‘o Kamehameha no nā kūlana po’o a luna paha ma kēia hope aku.

He nui nō nā Hawai’i kūpono nāna e lawelawe i ka hana ma nā kūlana nui, a ‘o ka hilina’i iā lākou, a e hai ‘ia i wahi e ho’okō ai lākou i ke kūleana o ia mau kūlana, ‘o ia ka mea e pono ai. Me ke aloha nō iā ‘oukou a pau.


E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

 

This column is coordinated by Kawaihuelani Center for Hawaiian Language at the University of Hawai’i at Mānoa.

 

Click here to see our full coverage of the coronavirus outbreak. Submit your coronavirus news tip.

Be the first to know
Get web push notifications from Star-Advertiser when the next breaking story happens — it's FREE! You just need a supported web browser.
Subscribe for this feature
Comments have been disabled for this story...

Scroll Up