Synopsis: ‘Ōiwi Journal’s latest volume is released.

I ka wehe ‘ana o Kepakemapa nei, ua puka ka ‘ehā o ka puke hō’ike’ike mana’o, ‘o ‘Ōiwi Journal na Kuleana ‘Ōiwi Press. ‘O ke po’omana’o nui e kau nei ma luna o kēia pukana, ‘o ia ho’i, “Kūpa’a mākou ma hope o ka ‘āina”. Ua pili nā kumuhana o nā mo’olelo i pa’i ‘ia ma loko o kēia pukana i ka mea i ‘ōlelo ‘ia ‘o nā ‘āina i “ho’ohui ‘ia” e ‘Amelika ma ka pae’āina nei a me ke kumuhana pū ‘o ka ho’omalu ‘ia ‘ana o ka pae’āina nei e ko ‘Amelika i kēia au.

He puke hō’ike’ike mana’o ‘o ‘Ōiwi Journal e ho’opuka ‘ia nei ma ke ‘ano he kaka’ina, ‘o ka mua, ua puka i ka MH 1999. Na Mahealani Dudoit i ho’okumu iā ‘Ōiwi Journal me kekahi po’e hoa i ‘i’ini e ho’omau i ka hana a nā kūpuna mai nā kenekulia ‘elua i hala a’ela e kākau a pa’i nui i nā mea o ko lākou mau na’au. Ma loko o kēlā me kēia pukana, hō’ili’ili ‘ia nā hana a nā po’e Kānaka Hawai’i like ‘ole, inā he mo’olelo a mele paha i kākau ‘ia a i ‘ole he ki’i i kaha a pa’i ‘ia paha. ‘O kekahi o nā hana i pa’i ‘ia, ‘o ia nā hana noi’i a ka po’e kākau ma ke kulanui a ma waho paha, a no kekahi po’e, he hana ia no ke pa’i wale ‘ia ‘ana nō ma loko o ‘Ōiwi Journal.

Ma hope o ka ho’okahuli ‘ia ‘ana o ke aupuni o Lili’uokalani, ua kā’ilikū ke aupuni kipi i nā ‘āina o ke Aupuni Mō’ī a me nā ‘āina pū o kēlā me kēia ‘ohana ali’i a ho’ohui pū i ia mau mea a kāhea ‘ia e ke aupuni ‘Amelika ‘o ia “nā ‘āina i ho’ohui ‘ia” ma lalo o ka ho’omalu ‘ana o ke aupuni kipi. ‘O ka mea pāha’oha’o, ‘a’ohe ku’ikahi “ho’ohui ‘āina” ma waena o ke Aupuni Mō’ī Hawai’i a me ‘Amelika e hō’oia’i’o nei i kēia mana’o. Ā hiki i kēia lā, lilo kēia kumuhana he paio hahana ma waena o ka māhele o ka po’e o ka pae’āina nei i a’o ‘ia no kēia ‘oia’i’o a me ke aupuni kipi o kēia wā e ho’omaumau nei i ka mana’o ho’ohuikau ua lilo ia he mea kū i ke kānāwai.

Ma ‘Ōiwi Journal ‘Ehā, puka kekahi mau mo’olelo na kekahi po’e kākau e pili ana i ko lākou mau mana’o a i ‘ole kā lākou hana noi’i e pili ana i nā ‘āina o ke Aupuni Mō’ī a me nā ali’i i mana’o ‘ia e ke aupuni kipi na lākou e ho’omalu. ‘Ike ‘ia ma nā kākau ‘ana o ka po’e kākau o kēia pukana ka laulā o nā mana’o pili i kēia kumuhana, ke kumu o nā “ ‘āina i ho’ohui ‘ia”, ka mea nui o ia mea, ka hana e ho’oponopono ‘ia ai kēia hihia, a me ke kūlana o ke kanaka koko Hawai’i a kupa Hawai’i ma loko o kēia kumuhana mea nui. Paipai a kōkua ‘ia kēia laulā o nā mana’o e nā luna ho’oponopono o ‘Ōiwi Journal me ka mana’o penei ke kūlana o ka ‘ike o ka lāhui o kēia au e holo nei a he pono ia.

‘O kekahi o nā mo’olelo o kēia pukana, he wehewehe ‘ana no ke kumu o ka Mele ‘Ai Pōhaku, he hō’ike na ke Kenekoa Alice Campbell i ka ‘Aha’ōlelo o ‘Amelika i ka 1946, he mau kolamu nūpepa ‘ōlelo Hawai’i o nā makahiki hope o nā 1800, a me nā mana’o o nā ‘ōpio a me kekahi po’e o’o o kēia au nei.

No ke kauoha ‘ana i kope, e leka uila iā oiwi@hawaii.edu a e nānā i ka ‘ao’ao o ka Internet, hawaii.edu/oiwi.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.