Synopsis: Teach for America continues to siphon funds from our community for its failed program.

‘Auhea ‘oukou e nä hoa makamaka o Kauakükalahale. Eia hou mai ua hui nei näna e ho’opakele iä käkou i ke kü’ono’ono ma ka ho’ouna aku i kä käkou kälä iä ha’i me ka huli kua wale mai i kä käkou po’e. Ua ‘ike ‘ia ka hopena o nä corps members a ka TFA i ho’ouna mai ai no ka ho’opakele mai i kä käkou po’e keiki i ka na’aupö. He mau haumäna maika’i ia no nä kula o ‘Amelika i ho’ouna ‘ia maila me ka mana’o e ho’opakele mai i kä käkou mau keiki i ka na’aupö. Aloha nö käkou. Ua hiki mai nö he 52 “corps members” i ko käkou ‘äina me ka mana’o e ho’opakele i kä mäkou po’e keiki i ka na’aupö. A he ‘elima wale nö makahiki ma ia hope mai, eia nö ke koe nei he 16 wale nö kumu. He 75% ke emi ‘ana mai!

‘O ka hiki mua ‘ana mai o ia po’e kumu ma ko käkou mau kapakai, ua ‘ölelo ‘ia läkou lä he po’e näna e ho’oikaika i ka ho’ona’auao ‘ia o nä keiki o Hawai’i nei. ‘O ka ‘oia’i’o, ‘o läkou wale nö kai ‘ike i ka pömaika’i o ka noho ‘ana ma ko käkou ‘äina nani. A i ka hala ‘ana he mau makahiki helu wale nö, ‘o ko läkou ha’alele nö ia no kekahi mau ‘oihana ho’okü’ono’ono ma loko. Pëlä nö paha ka pahuhopu o ua po’e lä. ‘A’ohe wahi mana’o maoli e kökua i kä käkou po’e kamali’i. He noho nö na’e ka hana ma palakaiko nei no kekahi mau makahiki, a i ka pau ‘ana o ia wä, ‘o ka ho’i akula nö ia i ko läkou wahi i hele mai ai, kahi ho’i e hana maoli ai ma loko o nä ‘oihana näna e ho’opiha maoli nö i ka pakeke i ke kälä. A ‘o nä keiki ma loko o nä kula, ‘o ia mau noho nele nö. Pau ke kälä a pau pü ho’i me kä läkou mau kumu. He makehewa ‘i’o nö ka hai ‘ia ‘ana o ua po’e corps member nei. He mau miliona kälä i ho’olilo ‘ia no ka hai ‘ana i ua po’e kölea nei a ‘o ka ho’i akula nö ia i ka ‘äina haole.

Eia nö ua ‘o TFA ke hö’a’o hou nei i ia hana kohu ‘ole. I këia manawa na’e, ke ho’owalewale nei i kä käkou mau haumäna ma o ka hä’awi ‘ana i ke kälä no ka lilo ‘ana i kumu. No hea mai lä na’e ia kälä? No kä käkou ‘auhau nö ia. ‘A’ole nö ia he makana na läkou i hä’awi mai ai. Na käkou nö ia kälä a ua ha’awi wale ‘ia aku iä ha’i. Pehea lä ko käkou mälama ‘ana i kä käkou? He nui ka po’e e ‘imi nei i hana a ‘o kekahi nö o ia po’e, e lilo nö i kumu maika’i no nä keiki. ‘O kä käkou hä’awi wale aku nö na’e ia i kä käkou kälä no ka hai ‘ana i këlä po’e kolea. ‘A’ole nö läkou i mäkaukau a komo wale aku nö na’e ma loko o ka lumi papa. He hüpö nö a lohe mai ke a’o.

‘O nä keiki a käkou, ua maopopo nö iä läkou ka hüpö o ia hana. Pehea lä e maopopo ‘ole ai iä käkou? Aia ko käkou pono i ka ho’omäkaukau ‘ana i po’e näna e hana no ka pono o kä käkou mau keiki a ‘a’ole no läkou wale iho nö. Aia ka mäkaukau a he komo nö i ka ho’omäkaukau ‘ana. ‘A’ohe nö e mäkaukau i ke kälä wale nö. No laila, e o’u mau hoa, mai nö e puni i ka ‘ölelo a ia hui. ‘O nä keiki ke nele.

E ho’ouna ‘ia mai nä leka iä mäua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mänoa, supported by the Initiative for Achieving Native Hawaiian Academic Excellence.