comscore Kūpihipihi loa kahi koena 'opihi | Honolulu Star-Advertiser
Editorial | Kauakukalahale

Kūpihipihi loa kahi koena ‘opihi

[ AD HAS BEEN REMOVED FROM THIS STORY ]

Synopsis: Everybody’s finances are dwindling, but prices are going up, with the possibility that University of Hawai’i tuition is going to increase again.

***

Aloha mai kākou e nā makamaka heluhelu mai ka pi’ina a ka lā i Ha’eha’e a kona welo loa ‘ana aku i ka mole ‘olu o Lehua.

‘O ia ‘ōlelo e kau a’ela ma luna, he ‘ōlelo no’eau ia mai nā kūpuna mai, a he ‘oia’i’o nō ho’i, ‘oiai, ‘a’ole nō i nui loa ke koena ‘opihi i kēia mau lā e like me ka wā ma mua. Akā, he kaona nō ho’i ko ia ‘ōlelo. ‘O ka ‘opihi, ‘o ke kālā nō ia. A no laila, ‘o kahi mana’o o ia ‘ōlelo no’eau, ua ‘u’uku loa maila ke kālā o ka pākeke a o ka waihona kālā paha.

A ua kūpihipihi loa paha kahi koena ‘opihi a ka nui o kākou e noho nei ma Hawai’i nei. A i ke kā’alo ‘ana aku nei i kahi kū’ai ‘aila ma ke alanui ‘o Mō’ī, ‘ike ‘ia aku nei ke kumu kū’ai o ka ‘aila, pohā ka lae. He $4.01 o ke kālani. Kainō, e emi hou ana a ka ‘ekolu kālā, eia kā, ke pi’i hou a’ela. A pēlā nō nā mea like ‘ole o nā hale kū’ai, ke pi’i li’ili’i a’ela ke kumu kū’ai. ‘O ka mea ‘āpiki, ua ‘oki ‘ia ka uku makahiki o nā limahana o ke aupuni. Pēlā nā kumu kula aupuni, ‘oki hou ‘ia ko lākou uku. (Ke lana nei ka mana’o, e lanakila nā kumu ma ka ho’opi’i ‘ana aku nei i ke aupuni.)

I loko nō o ia pi’i ‘ana o ke kumu kū’ai a me ke kūpihipihi loa ‘ana mai o kahi koena ‘opihi a nā kānaka, eia nō ka Papa o nā Kahu Kula o ke Kulanui o Hawai’i ke mana’o nei e ho’opi’i aku i ka uku kula. A ‘o ka nui o ia pi’i ‘ana no ke kama’āina ma ke kahua kulanui o Mānoa, he $528 i ka makahiki kula 2012. I hāpai ‘ia a’e ia pi’i ‘ana no ke kū like ‘ana o ke Kulanui o Hawai’i i ka pilikia, ua emi loa ka ‘opihi. Ma nā makahiki ‘elua i ka’ahope aku nei, ua ‘oki ‘ia he $86 miliona a ‘oi o ka mo’ohelu kālā o ia kulanui o kākou. Wahi a ka pelekikena o ke Kulanui o Hawai’i, M.R.C. Greenwood, ua makepono nō ia pi’i ‘ana, a ‘o ia ke emi loa i hiki. He ‘oia’i’o paha ia, akā, he hiki i nā ‘ohana ke uku aku? ‘O ia ka nīnau nui a ‘o ka mea ho’i e hopohopo nei ko ‘oukou mea kākau. ‘O ka mea ma’a mau ma mua, i ka wā i pi’i ai ka uku kula, ‘o ke emi ihola nō ia o nā haumāna. ‘O au paha kekahi e mana’o he makepono ka pi’i ‘ana he $528, inā ‘o ko’u uku makahiki, he $400,000, a he manuahi ko’u wahi e noho ana. ‘A’ole na’e pēlā. ‘O ke kūnānā wale aku nō paha ka hopena o kēia mea kākau nei, inā he haumāna e mana’o ana e ho’omau i ka ho’ona’auao ‘ana.

‘O ka mea maika’i, ‘a’ole e ho’opi’i wale ‘ia aku ka uku kula. E mālama mua ‘ia ana he 11 mau hālāwai a puni kēia pae’āina mai ka lā 16 o Kepakemapa a i ka lā 21 o ‘Okakopa, no ka hō’ike ‘ana o ka lehulehu i ke kūpono a me ke kūpono ‘ole paha o ka ho’opi’i uku kula. A no laila, inā he mana’o kou, e naue aku i kekahi o ia mau hālāwai a hō’ike aku i ia Papa Kahu Kula. A ‘o kekahi mea nui paha, e alu like kākou a pau ma ka ‘imi ‘ana i wahi e pono ai ke aupuni a pēlā pū me kākou a pau loa.

Me ke aloha iā ‘oukou e nā makamaka heluhelu. Ke ho’i aku nei ko Mānoa keiki, ua ahiahi.


E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

 

 

This column is coordinated by Kawaihuelani Center for Hawaiian Language at the University of Hawai’i at Mānoa.

Comments have been disabled for this story...

Click here to see our full coverage of the coronavirus outbreak. Submit your coronavirus news tip.

Be the first to know
Get web push notifications from Star-Advertiser when the next breaking story happens — it's FREE! You just need a supported web browser.
Subscribe for this feature

Scroll Up