Quantcast

Friday, July 25, 2014         

KAUAKŪKALAHALE


 Print   Email   Comment | View 2 Comments   Most Popular   Save   Post   Retweet

E nānā i ke kanaka nui a me ke kanaka iki

For Saturday, November 23, 2013

Na Kekeha Solis

POSTED:



 Synopsis: State Rep. Tom Brower is clueless as to what it takes to be a great leader.

———

Ua ku’i aku nei ka lono e pili ana i kekahi o nā lunamaka’āinana o kākou. ’O ka mea minamina, ’a’ole ia he lono e ha’aheo ai ko Hawai’i. He lono ho’ohilahila ia. ’O ia lono i hele a puni kēia pae ’āina nei, a puni nō ho’i ’o ’Amelika Hui pū ’ia, ’o ia ke kā’ili ’ana aku o ua wahi lunamaka’āinana lā i ke ka’a pahu o ka po’e kuewa, hale ’ole ho’i, a hahau aku i ia ka’a pahu i ka hāmale ku’i hao i ’ole e hiki ke ho’ohana hou ’ia. ’O ka inoa o ua wahi lunamaka’āinana lā, ’o ia ’o Tom Brower. He Kemokalaka ’o ia, a ’o ia ka lunamaka’āinana o Waikīkī me Ala Moana.

’O kahi mea e lana ai ka mana’o, ua pau ihola kāna hana ’ana pēlā ma muli o ka nui o nā kānaka e ho’ohalahala ana i kāna hana. ’O ka pilikia na’e, ’a’ole ’o ia ho’omaopopo iki i ke kūpono ’ole o kāna hana. E kuhi ana ’o ia, inā i hele aku ’o ia me ka hao wili a me ke kala, inā ’a’ole ’o ia i ho’ohalahala ’ia. ’Eā, inā paha i heluhelu ’o Brower no Kawelomahamahai’a, inā ua ’ike ’o ia, he hana kūpono ’ole kāna. Ua hō’ike ’o Hooulumahiehie, “I ka wa e ola ana o Kawelomahamahaia, ma kona mau la e noho alii ana no Kauai, ua hana oia i na hana e laupa’i nui ai na kanaka maluna o ka aina, mamuli o kona nana ana i ke kanaka nui a me ke kanaka iki; ke kanaka ulakolako o ka noho ana ame ke kanaka hemahema a nele o ka noho ana.” ’O ke kanaka nui wale nō kā Kawelomahamahai’a i nānā ai? ’O ka po’e ulakolako wale nō o ka noho ’ana? ’A’ole loa. ’O ka po’e kuewa kekahi o nā kānaka o Waikīkī a me Ala Moana, akā, ’a’ohe nānā o Brower iā lākou. He hana ’ino kā kāna.

Aia wale nō paha a hahau ’ia ’o Brower i ka hāmale ku’i hao, a laila, e ’ike ’o ia i ka hewa o kāna hana, ’o ia ho’i ka hana ’ino ’ana i ke kanaka. Pēlā ’o Kamehameha a me kona kūkala ’ana a’e iā Māmalahoe Kānāwai. Ua ’ike ihola ’o Kamehameha i ke kūpono ’ole o kāna hana, a kūkala a’ela ‘o ia, “E hele ka ’elemakule, ka luahine, a me nā kamali’i a moe i ke ala, ’a’ohe mea nāna e ho’opilikia.” A ’o ka mea ’āpiki, ua lilo ia kānāwai a Kamehameha i kūkala ai, i māhele no ke Kumukānāwai o Hawai’i nei e kū nei. A aia kā kekahi lunamaka’āinana o Hawai’i nei e mālama ’ole ana i ua kumukānāwai nei.

’A’ole ’o Brower i koho ’ia i luna kau kānāwai ma muli o kona ikaika. Inā he mana’o kona e hō’ike aku i kona ikaika, e komo paha ’o ia i loko o ka lina ho’olei pu’upu’u me Brian Viloria, a i loko paha o ka pahu paukū kaula hao me BJ Penn, a ma laila e ’ike ’ia ai ka ’ai a nā u’i. ’A’ole ho’i e hihi, ’a’ohe ona kino ikaika, no ke akamai paha ’o ia i koho ’ia ai i luna no kākou, ’a’ole na’e i ’ike ’ia kona akamai a hiki i kēia manawa.

E nānā i ke kanaka nui a me ke kanaka iki, ke kanaka ulakolako o ka noho ’ana a me ke kanaka hemahema a nele o ka noho ’ana. ’O ia ka mea e pono ai ’o Hawai’i.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:  
» kwong@hawaii.edu
» rsolis@hawaii.edu

a i ‘ole ia, ma ke kelepona:
» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 2 Comments   Most Popular   Save   Post   Retweet

COMMENTS
(2)
You must be subscribed to participate in discussions
By participating in online discussions you acknowledge that you have agreed to the TERMS OF SERVICE. An insightful discussion of ideas and viewpoints is encouraged, but comments must be civil and in good taste, with no personal attacks. Because only subscribers are allowed to comment, we have your personal information and are able to contact you. If your comments are inappropriate, you may receive a warning, and if you persist with such comments you may be banned from posting. To report comments that you believe do not follow our guidelines, email commentfeedback@staradvertiser.com.
Leave a comment

Please login to leave a comment.
Ken_Conklin wrote:
He kanaka nui au -- e nana i ko'u puhaka! Aka, he kanaka iki au, no ka mea, 'a'ohe o'u kaohi i loko o ke aupuni. No laila, e nana palua ia'u -- he kanaka nui a he kanaka iki (ka po'o o keia kolamu). He "BOGO" au -- e ku'ai mai kekahi, e loa'a mai ka lua manuahi.
on November 23,2013 | 04:05AM
DiverDave wrote:
Barry Sotelo is clueless as to what it takes to be a great leader.
on November 24,2013 | 02:20AM
IN OTHER NEWS
Latest News/Updates
Blogs
Political Radar
Wilhelmina Rise, et al.

Court Sense
Cold War

Political Radar
Climate change

Island Crafters
YouCanMakeThis.com

Warrior Beat
Empty pit

Political Radar
Switch

Political Radar
`Progressive hero’