Quantcast

Thursday, October 23, 2014         

KAUAKŪKALAHALE


 Print   Email   Comment | View 5 Comments   Most Popular   Save   Post   Retweet

I mua, e nā pōki'i, e inu i ka wai 'awa'awa

For Saturday, July 14, 2012

Na Kekeha Solis

POSTED:



Synopsis: There is a third University of Hawai'i football player who is alleged to have driven drunk? How did that happen?

———

Welina mai e nā makamaka heluhelu, ua lohe aku nei paha 'oukou i ka nūhou e pili ana i ka pilikia o ka 'ahamele o Stevie Wonder. Ha'i mai nei kekahi hoa, “Kainō 'o Stevie Wonder ka mea makapō, a he mau maka 'ike ko Jim Donovan, eia kā, he mau hoa makapō nō paha lāua 'elua.” 'Ae, pololei, ua 'āpuka mai kekahi kanaka iā Donovan ma ka 'ōlelo 'ana mai, e mālama 'ia ana ka 'ahamele o Stevie Wonder i mea e ho'oulu kālā ai no ka pono o nā 'ālapa o ke Kulanui o Hawai'i, 'a'ole na'e i hiki i ua kanaka lā ke ho'okō. Wahi a kekahi, “I hewa nō iā Donovan, 'oiai, 'a'ole 'o ia i noi'i pono aku.” Akā, e ho'oponopono koke 'ia ia pilikia. Eia mai ka ha'ina, inā 'a'ole e ho'iho'i 'ia ke kālā a nā kānaka a pau i uku ai no ke kikiki, na Donovan e uku mai loko mai o kona uku makahiki pono'ī. A 'o ia ihola.

'O ka pilikia i pū'iwa ai ka no'ono'o o ko 'oukou mea kākau, a me ka nui paha o 'oukou, 'o ia ka hopu 'ia 'ana o ke kolu o nā mea pā'ani kinipōpō pekupeku o ke Kulanui o Hawai'i no ke kalaiwa 'ana ma lalo o ka malu o ka wai 'ona. 'Ae, 'o ke kolu ia. 'O Cayman Shutter ka mua ma ka mahina 'o Malaki o kēia makahiki nei. 'O kona ho'opa'i, 'o ia ho'i, ua ho'omalu 'ia 'o ia, 'a'ole e pā'ani ma nā ho'okūkū mua 'ehā o ke kau. Kainō, he ho'opa'i ia e pau ai ia 'ano hana hūpō, eia kā, ua kalaiwa i mua a i hope paha kekahi mau hoa pōpō peku o Shutter ma hope o ka inu 'ana i ka wai 'awa'awa. 'O ia mau hoa, 'o ia 'o Alema Tachibana lāua 'o Alex Dunnachie. 'O ka 'oia'i'o, 'a'ole maopopo ke kū 'ana o ka hewa iā lāua, a me ke kū 'ole 'ana paha, koe aku ia. E kū ana 'o Tachibana i mua o ka luna kānāwai i ka lā 16 o Iulai, a 'o Dunnachie, ma hope aku.

'Eā, 'a'ole au he ‘ālapa, akā, inā he 'ālapa nō au, a ua ho'opa'i 'ia kekahi o ko'u mau hoa pā'ani ma muli o kona kalaiwa 'ana aku ma lalo o ka malu o ka wai 'ona, 'a'ole nō au e inu hou i ka wai 'ona a pau ke kau pōpō peku. A inā he puni nō i ka inu wai 'ona a i ka wai pipi'i ho'i, 'a'ole loa au e kalaiwa aku i ke ka'a. 'A'ole paha au e kau iki ma luna o ke ka'a ma ia kau holo'oko'a, 'o ke ko'ele wāwae ka mea e hiki pono aku ai i nā wahi a pau.

'O kekahi mea i pū'iwa ai ka no'ono'o o ko 'oukou mea kākau, 'a'ole wale nō ia he kānāwai no ka hui pōpō peku o ke Kulanui o Hawai'i, he kānāwai ia no nā kānaka a pau ma Hawai'i nei, 'o ia ho'i, 'a'ole e kalaiwa ke kanaka ke pulu ‘o ia i ka wai a ka nāulu ('ona). No laila, 'a'ole ia he kānāwai hou a Norm Chow e ho'okō aku nei, he kānāwai ia no nā makahiki he nui.

I mua, e nā pōki'i, a inā e inu 'oe i ka wai 'awa'awa, i ka wai lohi, a i ka wai pipi'i paha, ma luna wale nō o nā wa'a kaulua he 'umi ihu e hele aku ai.

Mahalo iā 'oukou no ka heluhelu 'ana mai. Ke ho'i aku nei ko Mānoa keiki, ua ahiahi.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 5 Comments   Most Popular   Save   Post   Retweet

COMMENTS
(5)
You must be subscribed to participate in discussions


IN OTHER NEWS
Latest News/Updates