Quantcast

Sunday, August 31, 2014         

KAUAKŪKALAHALE


 Print   Email   Comment | View 25 Comments   Most Popular   Save   Post   Retweet

Ahuwale ka 'ohe o uka

Na Laiana Wong

POSTED:



Synopsis: The bamboo of the upland can be seen by all. You say 30-meter telescope as if it is a good thing. Can we all see through it?

Aloha mai nō kākou e nā hoa makamaka e kāko'o nei i ka mana'o ho'ōla 'ōlelo Hawai'i. 'A'ole nō i hala i ko kākou mau maka ia mea he ho'okae 'ōlelo. Ua ahuwale ho'i ka pāpā 'ia o ka 'ōlelo Hawai'i 'a'ole e a'o 'ia ma loko o nā kula aupuni. A ua lilo ia i mea e emi loa ai ka nui o ka po'e 'ōlelo Hawai'i a 'ane'ane make kā kākou 'ōlelo makuahine.

I ka Pō'akahi nei, ua kupu hou mai kēia 'ano hihia ho'okae 'ōlelo. 'O ka mea 'āpiki na'e, 'o ka 'ōlelo haole kai ho'okae 'ia, a ua kū'ē 'ia na'e ma muli o kona mana'o Hawai'i.

Aia ma waho o ka hale kahiko o Ka Leo, ka mea e hō'ano hou 'ia nei, ua kūkulu 'ia he pā lā'au no ka palekana o nā haumāna e kā'alo'alo ana i mua ona. Ua 'ae 'ia kekahi mau hui haumāna e pena i mau ki'i nui ma luna o ia pā. I ka hopena pule nei, hele nui akula nā haumāna Hawai'i a me kekahi mau kumu no ke pena ‘ana i kekahi ki'i nui e hō'ike ana iā Mauna a Wākea (Mauna Kea) e kū kilakila ana i luna, a me nā kānaka Hawai'i e mūia ana ma lalo. Eia hou, ua kākau 'ia kekahi mau hua'ōlelo, ma ka namu haole na'e, e kū'ē ana i ka mana'o o ke Kulanui o Hawai'i e kūkulu i kekahi 'ohe nānā nunui ma luna o ia mauna kapu.

I ka ho'i 'ana mai o nā haumāna i ke kula ma ka Pō'akahi, kāhāhā, ua kā'ele 'ia ua mau hua'ōlelo nei a ua pena 'ia mai kekahi mau hua'ōlelo e ho'olaha ana i kekahi papahana e mālama 'ia ana e Ka Leo; ma ia wahi ho'okahi nō! Ua ho'ohuoi 'ia na kekahi limahana o Ka Leo ia hana i lawelawe malū ma mua o ke kakahiaka Pō'akahi. Wahi a ka waha'ōlelo o ke kulanui, i ke noi 'ana a ka hui haumāna i wahi ma ka pā e pena ai i kā lākou ki'i, 'a'ole i hō'ike 'ia ko lākou mana'o e pena pū aku i kēlā mau hua'ōlelo kū'ē.

He mea nui ia 'ohe no ke kulanui. He mea kōkua nui ho'i i ke a'o kilo hōkū. I ka mana'o o ke Kulanui, he mea waiwai maoli nō kēia e māhuahua ai ka 'ike o nā kānaka a pau. Eia hou ho'i, he kālā a he kaulana ke hō'ea mai ana kekahi. No laila, i ka mana'o o ka po'e kū'ē, he mea ho'ohaumia wale nō kēlā 'ohe nui i ka 'āina kapu, no ka mea, e lilo ana kēia mea nānā aku i mea pupuka e nānā nui 'ia mai. Eia hou, ua ke'ehi 'ia ko lākou pono siwila e hō'ike ai i ko lākou mana'o i mua o ke ākea. 'A'ole kā i kā'ele 'ia kekahi ki'i o nā hale kilo hōkū e kau mai ana ma kahi paia e pili koke mai ana nō.

I ka Pō'alua nei, ho'okahi wale nō lā ma hope o ka ho'onalo 'ia o ko lākou mana'o, ua huliāmahi nā haumāna, ma kahi o 300, i mua o ke ki'i, a ma hope o kekahi mau ha'i'ōlelo hō'eu'eu, ua kaka'i pū aku i ka hale hou o Ka Leo o Hawai'i no ke koikoi 'ana i nā luna o ia nūpepa e mihi mai i mua o ka po'e nāna i pa'u aku a pī ka 'amo ma ke pena 'ana i ia ki'i.

Ke kuhi nei au ē 'a'ole paha e kā'ele 'ia kēlā mau hua inā he mea ho'ohanohano ia i ke Kulanui. No laila, eia mai kahi nīnau wāhi pūniu: Pehea lā ke 'ano o kahi nūpepa i kapa 'ia 'o Ka Leo o Hawai'i ke pepehi mai 'o ia i ka leo o nā Hawai'i?

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 25 Comments   Most Popular   Save   Post   Retweet

COMMENTS
(25)
You must be subscribed to participate in discussions


IN OTHER NEWS
Latest News/Updates