Quantcast

Thursday, August 21, 2014         

KAUAKŪKALAHALE


 Print   Email   Comment | View 9 Comments   Most Popular   Save   Post   Retweet

He male ku'una kā?

For Saturday, June 29, 2013

Na Kekeha Solis

POSTED:
LAST UPDATED: 03:44 p.m. HST, Sep 25, 2013



Synopsis: What is traditional marriage?

———

He hihia pekelala nō kahi e kū'ē 'ia ana nā kānāwai o Hawai'i e ho'okapu ana i ka male 'ana, 'o ia ho'i, 'o ke kāne a me ka wahine wale nō nā mea e male kekahi me kekahi. 'O ka mana'o o nā mea ho'opi'i, he 'a'e ia i nā pono kīwila o ke kāne moe kāne, a o ka wahine moe wahine paha ma lalo o ke Kumu Kānāwai o 'Amelika Hui Pū 'Ia.

A ke lana nei ka mana'o o kekahi po'e, e hiki aku ia nīnau i mua o ka 'Aha Ho'okolokolo Ki'eki'e o 'Amelika Hui Pū 'Ia. A he mea maika'i paha ia. 'O nā luna kānāwai ki'eki'e o laila, he akamai ka hapanui, 'a'ole hāiki ka no'ono'o 'ana o lākou a pau. 'Akahi nō a kau 'elua 'ōlelo ho'oholo a ia mau luna kānāwai ki'eki'e. 'O kekahi, ua ho'opau 'ia kahi 'ōlelo pekelala, he māhele no loko mai o ke Kānāwai Kūpale Male o ka makahiki 1996 (DOMA), e hō'ole ana i ke ka'a 'ana aku o nā pōmaika'i i nā kōko'olua, he kāne a he kāne, a he wahine a wahine paha, i male ma ke kānāwai. A 'o kekahi 'ōlelo ho'oholo, ua ho'opau 'ia ke Kumumana'o 8 o Kaleponi, 'o ia ho'i 'o Proposition 8, a i kēia manawa, he hiki ke ho'omau i ka hā'awi 'ana aku i ka laikini male i ke kāne moe kāne, a i ka wahine moe wahine paha.

'O ka mea i pū'iwa ai ka mana'o, ma ia mau 'ōlelo ho'oholo 'elua, he 5 wale nō luna kānāwai kāko'o, a he 4 luna kānāwai hō'ole. A no laila, inā ha'alele paha kekahi luna kānāwai ki'eki'e i ka 'Aha Ho'okolokolo Ki'eki'e, e loli paha ka hopena o kekahi mau hihia e pili ana i kēia nīnau ma kēia hope aku.

A 'o ka mea i 'ano 'ē ai ka na'au, 'o ka po'e kū'ē i ka male 'ana o ke kāne me ke kāne, a o ka wahine paha me ka wahine, he kāko'o lākou i ka ho'okae 'ana. Ma ka hai 'ia 'ana o ke kanaka no ke kūlana hana, 'a'ole hiki ke ho'okae i ka 'ili, a i ka wahine, a i ke kāne paha. A no ke aha lā e 'ae 'ia ai ka ho'okae 'ana i ke kāne a i ka wahine paha ma ka male 'ana?

'O kekahi po'e, 'ōlelo lākou, he mea ku'una ka male 'ana o ke kāne me ka wahine. Inā pēlā, pehea ho'i ka ho'okauā kuapa'a 'ana? He mea ku'una ka ho'okauā kuapa'a mai kahiko mai, 'a'ole na'e i 'ae 'ia i kēia mau lā.

'O ke ku'una 'ana o ka male (o ke kāne a me ka wahine ho'i), 'o ia ihola ka mea e mau ai pēlā? Inā hāiki ka no'ono'o o ke kanaka i kona wā e kamali'i ana, pēlā e mau ai ia hāiki o ka no'ono'o a kaniko'o, a kolopupū, a haumaka'iole, a palalauhala. Inā he na'aupō ke kanaka, e mau kona na'aupō a kona ha'alele 'ana mai i kēia olahonua?

A 'o kekahi, ua 'ōlelo 'ia ma ka male ku'una, he kuleana ko ke kāne, a he kuleana ko ka wahine. Akā, i kēia mau lā, 'a'ole i like ia mau kuleana ku'una. I kekahi manawa, na ke kāne e mālama i nā keiki, a na ka wahine e hele i ka hana. 'A'ohe pilikia o ia.

'O ka hiki i ka wahine ke hānau keiki, 'o ia ke kumu e pono ai ka male 'ana i ke kāne a me ka wahine? Pehea inā 'a'ole hiki i ka wahine ke hānau keiki a hiki 'ole paha i ke kane ke ho'ohāpai i ka wahine? He male ku'una nō ia? 'A'ole e kapa 'ia he male ku'una? He male ku'una nō, a no laila, e 'ae 'ia ka male 'ana o ke kāne me ke kāne a o ka wahine paha me ka wahine ma ke kānāwai.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 9 Comments   Most Popular   Save   Post   Retweet

COMMENTS
(9)
You must be subscribed to participate in discussions


IN OTHER NEWS
Latest News/Updates
Blogs