Quantcast

Tuesday, July 22, 2014         

KAUAKUKALAHALE


 Print   Email   Comment | View 1 Comments   Most Popular   Save   Post   Retweet

Ka hana malū

Na Kekeha Solis

POSTED:



Synopsis: Nobody will deny that finding unexploded ordnance possibly saves lives. Perhaps the governor should have learned the 'ōlelo no'eau, “I ali'i ke ali'i i ke kanaka.”

Aloha mai kākou e nā makamaka heluhelu mai Hawai'i moku o Keawe, a i ka moku kā'ili lā 'o Ni'ihau. 'O ia 'ōlelo e kau a'ela i luna, he 'ōlelo ia e lohelohe 'ia nei a puni kēia pae'āina nei no ke Kia'āina Neil Abercrombie, 'o ia ho'i, ua kauoha wale 'ia me ka kūkala 'ole aku i ka lehulehu ke kuahaua ulia pōpilikia, e 'imi aku ka Pū'alikoa Wilikī i nā pōkā pahū i pahū 'ole e waiho wale ana ma ka 'āina a loa'a, e lawe 'ia aku a ma kahi palekana e ho'opahū 'ia ai. A ua hana 'o ia pēlā me ka hō'ike 'ole 'ana a'e i ka lehulehu. Ma Iune ke kuahaua, a 'akahi nō a lohe 'ia ma ke kaona, a ma kua'āina nō ho'i.

'Eā, he mea nui ka lawe 'ia 'ana aku o ia mau pōkā pahū ma kahi 'ē i 'ole ho'i e pō'ino ke ola o kahi kanaka a waiho iho i hope nei kona 'ohana a me nā hoa aloha e uē pa'iāuma ana nona. A no laila, ua pololei nō ka 'ōlelo a ke ke'ena o ke Kia'āina, 'o ia ho'i, ua makepono ka hana a ke aupuni (ma ia kuahaua 'ana). 'A'ohe 'ōlelo 'ana, ua makehewa ka loa'a 'ana mai o ia mau pōkā pahū a ho'opahū 'ia ma kahi palekana. 'O ka hana malū a ke Kia'āina, 'o ia ka mea i 'ano 'ē ai ka na'au. Inā hana 'o ia pēlā, he aha lā nā hana 'ē a'e āna e hana malū ai.

'O nā kānaka, 'o ia nā mea e kū nei 'o Abercrombie i ka moku, a eia kā 'o ia ke hūnā aku nei i kāna mau hana, āna e mana'o nei, no ka pono ia o ka lehulehu o Hawai'i nei. Inā pēlā, e hō'ike 'ia i mua o nā maka o nā kānaka. 'A'ole na'e 'o ia i hana pēlā, a no laila nō i ho'ohuoi ai ka nui manu me ke kanikani nō o ka nuku 'o'oi.

'A'ole paha i a'o kahi kia'āina o kākou i ka 'ōlelo a kahiko, 'o ia ho'i, “I ali'i nō ke ali'i i ke kanaka.” A ke 'ōlelo nei ko 'oukou mea kākau, ua like nō ia no ke kia'āina. I kia'āina nō ke kia'āina i ke kanaka. He kuleana no ko ke kia'āina, 'a'ole maika'i ke hana'ino wale 'ia nā kānaka. Ua 'ike paha kākou a pau i ka mo'olelo o Hakau. 'A'ole e like ka hopena o ke “ali'i” ho'oluhi i kēia mau lā, akā, he mea pono nō ka mālama 'ana i ke kanaka, 'a'ole e hana 'ino wale 'ia aku.

'O ke a'o 'ole paha i ia 'ōlelo kahiko kāna kumu e hana'ino mai nei i nā kumu kula aupuni, nā kumu ho'i nāna e mālama a e a'o nei i kā kākou mau pua. A ua maopopo nō iā kākou a pau, 'a'ole nō i mālama pono 'ia nā kumu kula aupuni no nā makahiki he nui, a ua kuhi paha kākou, 'o Abercrombie kā lākou mea e pakele ai i 'ino. Launa aku nei nā kākou me ke Ali'i nui o O'ahu, me Kakuhihewa.

'A'ole nō i hala ka Pu'ulena, e ke kia'āina. 'O kāu hana, e nānā i nā 'ōlelo akamai a nā kūpuna o kēia pae'āina nei. A pēlā pū me nā mo'olelo, o 'ōlelo 'ia 'oe he hoa no nā ali'i ho'oluhi o Ka'ū. E hahai 'oe i ia mau 'ōlelo kahiko, a e kū hou paha 'oe i ka moku, ke hiki hou mai ka wā koho pāloka. Inā 'a'ole 'oe e maka'ala i ia mau 'ōlelo a me nā mo'olelo, 'a'ole e ō kou inoa ma kēia hope aku.

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2627 (Kekeha)
This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 1 Comments   Most Popular   Save   Post   Retweet

COMMENTS
(1)
You must be subscribed to participate in discussions
By participating in online discussions you acknowledge that you have agreed to the TERMS OF SERVICE. An insightful discussion of ideas and viewpoints is encouraged, but comments must be civil and in good taste, with no personal attacks. Because only subscribers are allowed to comment, we have your personal information and are able to contact you. If your comments are inappropriate, you may receive a warning, and if you persist with such comments you may be banned from posting. To report comments that you believe do not follow our guidelines, email commentfeedback@staradvertiser.com.
Leave a comment

Please login to leave a comment.
Thinkaboutit wrote:
Eo, e Kekeha la eeee! Pololei 'oe! Aloha wale...
on September 26,2011 | 09:14AM
IN OTHER NEWS
Latest News/Updates
Blogs
Wassup Wit Dat!
Silver Pockets Full

Political Radar
VoteVets

Political Radar
Values

Island Crafters
Christmas in July

Political Radar
IBEW endorsement

Warrior Beat
Travel day

Small Talk
Counting coins