Huli kua nā ‘ale o ka moana

Synopsis: The holiday season is here, the time of festive cheering. Urge friends and family to not drink and drive or speed recklessly.

———

Welina e nā makamaka heluhelu o Kauakūkalahale. Aia nō ke hiki maila ka wā Kalikimaka. A he wā piha hau'oli nō ia e nanea ai me ka 'ohana a me ka hoa aloha. 'O ka mea minamina na'e, he wā ho'i ia e inu ai i ka wai e pipi'i. A ma laila paha ka 'ūpē a me ka waimaka e like me ka mea i 'ike 'ia i kekahi lā ma mua iki aku o ka Lā Ho'omaika'i. E holo pupule ana kekahi mau 'ōpiopio 'ekolu ma luna o kekahi ka'a ma 'Ewa a ho'oku'i akula ua ka'a lā o lākou i kekahi ka'a. A 'o ka mea minamina, ua make ihola kekahi kaikamahine 'ōpiopio, he 'umikumamāhā wale nō ona makahiki. A lawe 'ia akula kekahi mau 'ōpiopio a me ka wahine nona ke ka'a i ho'oku'i 'ia i ka haukapila ma ke kūlana kūpiliki'i kekahi a me ke kūlana kūkonukonu kekahi. He nui loa nā 'ohana a me nā hoa aloha e kūmākena nei ma muli o ka hala 'ana o ia kaikamahine aloha. Inā paha i huki 'ia ke kī ka'a mai kona lima mai, a i ha'i aku paha mai nō a holo pupule, inā e mau ka mohala 'ana a'e o ia kaikamahine.

A no laila, eia ko 'oukou mea kākau ke paipai aku nei iā 'oukou, e nā makamaka heluhelu, ke 'ike aku i ka 'ohana a hoa paha i hele aku nei i Halapē (ua 'ona), e huki wale aku i ke kī ka'a i 'ole 'o ia e kalaiwa ma lalo o ka malu o ka wai 'ona a i 'ole ho'i e lu'ulu'u nā 'ohana a me nā hoa i ka hala 'ana o kahi mea aloha nui 'ia.

A inā 'o ka holo pupule 'ana ka pilikia. E hana like. E kauoha aku, 'a'ole e hana pēlā, a inā e noke aku 'o ia i ia hana hūpō, e ha'i aku iā ia, e ho'okū i ke ka'a, a e lele iho 'oe i lalo i pakele ke ola.

'O ia ka hana pono, akā, he hana nui ia. E hopohopo paha kākou, o nāukiuki auane'i ia hoa a ho'omaka a'e 'olua e ho'opa'apa'a a hakakā paha a e hele a kō ia 'ōlelo e kau a'ela i luna, 'o ia ho'i, huli kua nā 'ale o ka moana. 'Eā, 'a'ole pilikia inā e kō ia 'ōlelo, no ka mea, e mau ana nō ke ea ma nā puka ihu. Mai nō a hopohopo i ka pi'i o ke kai o kekahi, e hopohopo i ka pio o ke kukui, ka mea ho'i e 'eha walania ai ka na'au o nā kānaka he nui, nā kānaka ho'i i aloha nui 'ia.

'Auhea 'oukou e nā kānaka puni i ka inu wai 'ona, i kou wā e koni ai i ka wai hu'ihu'i o ke kini lā, e ho'opa'a i kanaka nāna e lawe hele aku 'oe i nā loko wai o ke kaona, a laila, e inu nō a kena. A mai nō a poina, ke kalaiwa 'oe i ke ka'a a ua pulupē i ka wai pipi'i, 'a'ole 'o 'oe wale nō ke pilikia, he kanaka a mau kānaka 'ē a'e ke pilikia, ke 'eha, a ke make paha.

Ke lana nei ka mana'o o māua nei o Kauakūkalahale, e maika'i kēia wā le'ale'a e hiki mai ana, a 'a'ole e make hewa kekahi i ke kanaka kalaiwa 'ona a i ke kanaka holo pupule paha.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.