Quantcast

Thursday, October 30, 2014         

KAUAKŪKALAHALE


 Print   Email   Comment | View 2 Comments   Most Popular   Save   Post   Retweet

Ka ulu pono a mau loa

For Saturday, June 22, 2013

Na Kekeha Solis

POSTED:



Synopsis: The state and the University of Hawaii can combine landscaping and sustainability to help the community.

———

Welina e nā hoa makamaka. I ka heluhelu 'ana aku i ke po'o mana'o e kau a'ela i luna, ua no'ono'o ihola paha 'oukou, “He aha ia mea 'o ka ulu pono a mau loa?” 'O ia ka 'ōlelo a ko 'oukou mea kākau i koho ai no ka “sustainability”. 'O ka mālama 'āina paha kekahi 'ōlelo kūpono. 'Akahi nō a lilo ia mea 'o ka ulu pono a mau loa i mea nui. No ke aha ia i lilo 'ole ai i mea nui ma mua loa, he 50 makahiki aku nei? 'A'ole ho'i e hihi, ua hala ia, a no laila, e holo mua kākou. 'O ka ulu pono a mau loa, he mea ia e pono ai kākou o kēia au e ka'a aku nei, a me nā pua a kākou ma kēia hope aku. A 'o ia nō paha ke kumu o ke aupuni moku'āina o Hawai'i i ho'okumu ai i ka hui hana pahuhopu ulu pono a mau loa no ka makahiki 2050. A he mea nui nō ho'i ia i ke Kulanui o Hawai'i, 'o kekahi pahuhopu, 'o ia ka hana e ulu pono ai a mālama pono 'ia ai ka uila, ka wai, ka pepa a me ia waiwai aku, ia waiwai aku.

He nui nō paha nā mana'o a me nā 'ano o ia mea 'o ka ulu pono a mau loa. A 'o kekahi, 'o ia ka hana 'ana a loa'a ka mea 'ai e ola ai nā kino o kākou. A no laila i kupu ai kekahi nīnau i loko o ko 'oukou mea kākau, 'o ia ho'i, i ke kanu 'ana o ke aupuni moku'āina, ke kūlanakauhale paha a me ke Kulanui o Hawai'i i ka lā'au no ka ho'onani 'ana aku i ka hi'ohi'ona 'āina, no ke aha e kanu 'ole 'ia ai ka mea kanu 'ai 'ia, 'o ke kumu 'ulu 'oe, 'o ke kumu manakō 'oe, 'o ke kumu laikī a pēlā aku. Ke pa'ipa'i pono 'ia ia mau kumu 'ulu, e nani nō ke nānā aku, a e ha'aha'a loa paha ka hua 'ai. A 'o nā hua e loa'a ana, e hā'awi 'ia aku paha i ka po'e 'ilihune a me ka po'e kuewa paha, e kū'ai 'ia aku paha.

'A'ole paha e kanu 'ia ke kumu niu, no ka mea, 'o ka nui o nā kumu niu ma ka 'āina aupuni, 'oki 'ia ka hua, 'a'ohe hua, aloha nō. 'A'ole ia he hana e ulu pono ai a mau loa. E hopohopo ana paha o hā'ule ka hua a pā ke po'o o kekahi. Inā pēlā, e hana i mau hō'ailona i 'ole e kū ke kanaka ma lalo o ke kumu niu.

Inā 'a'ole makemake ke aupuni e kanu 'ia aku ka mea kanu, e kanu 'ia aku paha ka lā'au e pono ai ka lapa'au 'ana a me nā 'ano hana like 'ole paha, 'o ka ulana 'ana, 'o ke kuku kapa paha a pēlā aku. Akā, ma mua o ke kanu 'ana aku, e kama'ilio aku paha ke aupuni i ka po'e akamai ma ia mau māhele i koho pono 'ia ka lā'au e kanu ai. A laila, 'o ka lā'au, ka lau, a pēlā aku, e loa'a ana, e hā'awi 'ia aku i nā kānaka e ho'ohana ana, e kū'ai 'ia aku paha.

A 'o kekahi, e hana paha ke aupuni i mau pā a puni kēia pae 'āina, kahi e kiloi 'ia ai nā 'āpana kumu lā'au ke kua 'ia. I kekahi manawa, i ke kua 'ia 'ana o kekahi kumu lā'au, ua kiloi wale 'ia ma ka'e o ke alanui, a ma ka pōmaika'i, ua 'ike 'ia ka waiho wale 'ana o ia mau 'āpana lā'au e kekahi hoa, a lawe 'ia akula. Akā, inā 'a'ole i 'ike 'ia, inā ua pau ka pono. Na wai lā i kiloi wale aku i ia mau 'āpana lā'au? Akā, inā i loa'a kahi 'āina e kiloi 'ia ai ka 'āpana lā'au makemake 'ole 'ia, he mea maika'i nō ia, a 'o ka po'e kālai, e ki'i wale aku.

Inā e hana aku nō ke aupuni pēlā, he mea maika'i ia no ke kaiāulu.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 2 Comments   Most Popular   Save   Post   Retweet

COMMENTS
(2)
You must be subscribed to participate in discussions


IN OTHER NEWS
Latest News/Updates