Quantcast

Thursday, November 27, 2014         

KAUAKŪKALAHALE


 Print   Email   Comment | View 4 Comments   Most Popular   Save   Post   Retweet

Kāko'o paha ke Akua

Na KEKEHA SOLIS

POSTED:



Synopsis: Maybe God supports same-sex marriage.

———

I ka Pō'ahā nei, ua pūlima aku nei ke Kia'āina Neil Abercrombie i ka pila e 'ae ana i ka male 'ana he kāne a he kāne, a he wahine paha a he wahine, a lilo ai i kānāwai. E kū ana ke kānāwai i ka lā 2 o Kēkēmapa. Mahalo e nā Lunamaka'āinana a me nā Kenekoa i kāko'o i ua pila nei i loko o ke kanikani 'ana o ka po'e e kū'ē ana. 'Eā, i 'olā'olā nō ka huewai i ka piha 'ole.

I loko o ka nui o nā kānaka e kū'ē ana, ua nui nō ho'i ka po'e kānaka e kāko'o ana i ua pila nei. Ua alu like nō ho'i nā luna o kekahi mau 'ekalesia he 30 no ka hō'ike 'ana i ko lākou kāko'o 'ana i ia 'ano male 'ana. Ua huliamahi nō nā kānaka ho'okae i ka male 'ana o ka po'e moe aikāne, 'a'ole na'e i lawa. A no laila, ke kuhi nei ko 'oukou mea kākau, he kāko'o paha ke Akua i ia 'ano male 'ana? Wahi a kekahi po'e kāhuna pule, ma ka Palapala Hemolele, ho'āhewa 'ia ka moe aikāne. Akā, wahi a kekahi, 'a'ole ho'āhewa 'ia. Ua lilo ia nīnau i mea ho'opa'apa'a 'ia. 'A'ole paha i mōakāka ka 'ōlelo ma ka Palapala Hemolele. A ma muli paha o ia akāka 'ole, aia nō ke Akua ke ho'olaha iho nei i kona mana'o, 'o ia ho'i, inā he aloha ke kāne i ke kāne, a 'o ka wahine paha i ka wahine, he kūpono ka male 'ana. A 'o ia ihola paha ka mea i kāko'o ai ai nā luna o ia mau 'ekalesia he 30 i ia 'ano male 'ana. Ua hō'ike akula ke Akua i nā kāhuna pule o ia mau hale pule i kona makemake.

'A'ole hiki ke kākau hou 'ia ka Palapala Hemolele me ka ho'ololi 'ana i kekahi mau paukū ma 'ō a ma 'ane'i o ua Palapala Hemolele lā. Ua pa'a ihola ia 'ōlelo a ke Akua ma ka puke. Ua pau ka Baibala i ka unuhi 'ia ma nā 'ōlelo he 400 a 'oi ('o ka 'ōlelo Hawai'i a me ka 'ōlelo pa'i 'ai kekahi o ia mau 'ōlelo). A no laila, ma o ia mau kāhuna pule a me ka 'Aha 'Ōlelo paha e laha ai kēia makemake o ke Akua. Inā i kū'ē ke Akua i ia 'ano male 'ana, inā ua pau ka pono o ia pila. E ke Akua, “E mālama 'ia kou makemake ma ka honua nei, e like me ia e mālama 'ia ma ka lani lā.”

Ua pū'iwa ka no'ono'o o ko 'oukou mea kākau i ke kāko'o 'ana o nā luna kau kānāwai a me ka wikiwiki o ka holo 'ana o ka mana'o. He kāka'ikahi paha ko lākou kāko'o 'ana i ka hapa 'u'uku. 'A'ole paha lākou luna i kīpē 'ia, 'oiai, 'o ka po'e nui o ke kālā, aia ma kekahi 'ao'ao. No laila, he mana Akua nō paha ia. Ma kekahi mau nīnau, he lō'ihi loa ke kūkākūkā 'ana. Na ke Akua paha, na nā akua a me nā kūpuna paha i hō'ike iā lākou luna i ke ala kūpono.

'A'ole i hō'ike ke Akua i kona mana'o i nā kānaka a pau, a no laila nō kākou i 'ike ai i kekahi po'e kāhuna pule e kū'ē ana i kona makemake. Akā, ua wae pono akula 'o ia i nā koa. A ua kō kona makemake.

A 'o ka manawa kūpono nō ho'i kēia e a'o 'ia ai ke aloha o ke kāne i ke kāne, a 'o ka wahine paha i ka wahine ma nā kula aupuni o Hawai'i nei. 'A'ole e ho'okae 'ia.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu

a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 4 Comments   Most Popular   Save   Post   Retweet

COMMENTS
(4)
You must be subscribed to participate in discussions


IN OTHER NEWS
Latest News/Updates